變動型再生能源（比論講風力能和太陽能）、佮in互補ê技術（比論講電池存能）、以及能源消費ê電力化（比論講電動車ê成長），致使配電網劇烈ê改變。因為遮ê技術ê本性，以及電力系統ê物理特性因in ê變化，電力系統需要新ê彈性。
Piàn-tōng-hîng tsài-sing lîng-guân (pí-lūn-kóng hong-li̍k-lîng hām thài-iông-lîng), kah in hōo-póo ê ki-su̍t (pí-lūn-kóng tiān-tî tsûn-lîng), í-ki̍p lîng-guân siau-huì ê tiān-li̍k-huà (pí-lūn-kóng tiān-tōng-tshia ê sîng-tióng), tì-sú phuè-tiān-bāng ki̍k-lia̍t ê kái-piàn. In-uī tsia-ê ki-su̍t ê pún-sìng, í-ki̍p tiān-li̍k hē-thóng ê bu̍t-lí ti̍k-sìng in in ê piàn-huà, tiān-li̍k hē-thóng su-iàu sin ê tân-sìng.

佇這冊論文，阮研究電力消費者佇配電網轉型ê角色。阮問兩ê問題：電力消費者主動提供in ê彈性資本予電力調度業者ê價值有偌濟，以及in佇無仝款ê市場內底會當提著ê利純。
Tī tsit tsheh lūn-bûn, gún gián-kiù tiān-li̍k siau-huì-tsiá tī phuè-tiān-bāng tsuán-hîng ê kak-sik. Gún mn̄g nn̄g-ê būn-tê: tiān-li̍k siau-huì-tsiá tsú-tōng thê-kiong in ê tân-sìng tsu-pún hōo tiān-li̍k tiàu-tōo gia̍p-tsiá ê kè-ta̍t ū guā-tsē, í-ki̍p in tī bô-kâng-khuán ê tshī-tiûnn lāi-té ē-tàng the̍h-tio̍h ê lī-sûn.

為著回答這兩ê問題，這冊論文內底用著創新ê能源系統佮財經投資模型，來研究電力消費者佇大尺度和小尺度ê影響。
Uī-tio̍h huê-tap tsit nn̄g-ê būn-tê, tsit tsheh lūn-bûn lāi-té iōng-tio̍h tshòng-sin ê lîng-guân hē-thóng kah tsâi-king tâu-tsu bôo-hîng, lâi gián-kiù tiān-li̍k siau-huì-tsiá tī tāi-tshioh-tōo hām siáu-tshioh-tōo ê íng-hióng.

佇這冊論文內底，阮共研究重心囥在挪威。阮發現一般講起來，電力消費者ê彈性佇電力系統有正面毋過無濟ê價值。準講是按呢，電力消費者會當獲得ê利純對in家己來講，猶閣有可能足顯著ê。這冊論文內底ê成果會使幫助相干ê政策討論。
Tī tsit tsheh lūn-bûn lāi-té, gún kā gián-kiù tiōng-sim khǹg tsāi ná-ui. Gún huat-hiān it-puann kóng–khí-lâi, tiān-li̍k siau-huì-tsiá ê tân-sìng tī tiān-li̍k hē-thóng ū tsiànn-bīn m̄-koh bô tsē ê kè-ta̍t. Tsún-kóng sī án-ne, tiān-li̍k siau-huì-tsiá ē-tàng hi̍k-tit ê lī-sûn tuì in ka-kī lâi kóng, iû-koh ū khó-lîng tsiok hián-tù ê. Tsit tsheh lūn-bûn lāi-té ê sîng-kó ē-sái pang-tsōo siong-kan ê tsìng-tshik thó-lūn.